Rusiye tarafından apis cezasına mahküm etilgen ve Rusiyeniñ Krasnoyarsk bölgesindeki Minusinsk apishanesine etap etilmesi beklengen Qırımtatar Milliy Meclis reisiniñ muavini Nariman Celâlnıñ qayda olğanı alâ daa belli degil.
Bunı Facebookta apayı Leviza Celâlova haber etti.
"Nariman aqqında alâ daa bir şey belli degil, qayda o, alı ne - bir şey bilmeyim. O alâ daa mektüp yazmaq ya da telefon etmek fırsatından faydalanıp olamadı. Ne içün faydalanıp olamdı, bellesem, ritorik sualdir. Bunıñ aselet yapılğanında eminim. Böyle etip oña psihologik basqı eteler", - dep yazdı Leviza.
Aynı zamanda onıñ sözlerine köre, Narimannen beraber bu dava boyunca apis etilgen Aziz Ahtemov daa noyabrniñ 10-nda Krasnoyarsk bölgesiniñ Yeniseysk apishanesine kelip çıqqan, ağası Asan Ahtemov ise Vladimir vilâyetindeki apishanege etap etilmekte.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Oktâbrniñ 2-nde Nariman Celâl ve ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
