"Qırım musulmanları davası"nıñ mabüsi Lenur Seydametovnıñ acele tibbiy yardımğa ihtiyacı bar eken. Apishanede oña tiz buğumında Beyker kistası diagnozı qoyulğan. "Qırım birdemligi" cemaat birleşmesiniñ haber etkeni kibi, onıñ daa bir ameliyatqa ihtiyacı bar.
Qırımtatarnıñ apayı bir buçuq ay hastahanege yatqızılmasını beklegen. Erkekni baqqan jerrah ameliyatnıñ kerek olğanını tasdıqlağan.
"O hastahanege raatlıq künleri ketirildi, endi iş künlerini beklemek kerek", - dep ayttı Acire Seydametova.
Haber etilgeni kibi, Seydametov bir qulağına eşitmegeninden de aytına eken.
Qırımtatar Novoçerkash SİZO-sından Lipetsk vilâyetiniñ Yelets şeerindeki SİZO-ğa 2022 senesi yanvar ayında etap etildi.
2021 senesi fevral ayında Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
