Rusiye mahkemesi tarafından 15 yıl apis cezasına mahküm etilgen kezlevli ressam Bogdan Ziza ukrayin siyasiy mabüsleriniñ episi azat etilmegence açlıqnı toqtatmaycağını bildirdi. Bunı o, Rostov-na-Donudaki SİZO-dan yazğan mektübinde bildirdi. Mektüpni "Gratı" leyhası yayınladı.
Ziza bu mektüpte onı açlıqnı toqtatmağa qandırğanlarını bildirdi. Aynı zamanda, bu adımğa evelden azırlanğanı içün özüni şimdilik özüni yahşı is etkenini qayd etti.
"Er kes menim açlığım kimsege kerek degil, er keske epsi bir olğanını isbatlamağa tırışa. Er kes onı toqtatamğa qandıra, amma men bu müim olmağanını añlatmaqtan boldurmayım... Talaplarım şimdi ve mında irişilmez dir, amma menim maqsadım o degil. Eñ esası siyasiy mabüslerniñ meselesine diqqat çekmektir. Oturıp, bunıñ özü çezilecegini, menim yerime birisi yapacağını beklemek menim içün qıyındır", - dep yazdı Ziza.
İyünniñ 10-nda siyasiy mabüsniñ tatası Qırım.Aqiqatqa Bogdan Zizanıñ açlıq ilân etkenini bildirgen edi.
İyünniñ 6-nda Rusiye mahkemesi kezlevli ressam Bogdan Zizanı tuvğan şeerinde keçirgen cenkke qarşı aktsiyası içün 15 yıl apis cezasına mahküm etti.
2022 senesi mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tövbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
