Rusiye mahkemesi tarafından 7 yıl apis cezasına mahküm etilgen qırımlı vatandaş jurnalisti İrına Danılovıçnıñ sol qulağı eşitmey qalğan. Bunı "Qırım birdemligi" cemaat birleşmesi mahkümniñ babasına atfı etip bildire.
Jurnalistniñ babasısı onıñ eşitme siñiriniñ atrofiyağa oğrağanını tahmin ete. O eki kere hasthanege çıqarılğan edi, amma ne talillerniñ neticeleri, ne de diagnoznıñ özü aqqında malümat berilmegen. Ekim yazıp bergen ilâclar ise berimey eken.
Uquq qoruyıcılar Danılovıç pek azğanını, sürekli baş ağırlarından ve areketiniñ koordinasıyanınıñ bozulmasından aytınğanını bildireler. Bundan ğayrı oña tuvğanları ile körüşmege ya da olarğa telefon etmege izin bermey ekenler.
Martnıñ 22-nde Qırımda 7 yıl apis cezasına mahküm etilgen vatandaş jurnalisti ve emşire İrına Danılovıç "normal tibbiy tedaviylev kösterilgenine qadar ya da ölgence" quru açlıq aktsiyasını ilân etken edi.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırışa edi. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Video adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
