Rusiyede 12 yıl apis cezasına mahküm etilgen qırımtatar uquq qoruyıcısı Emir-Usein Kuku acele ameliyat etilgen. Bunı "Qırım birdemligi" cemaat birleşmesine ömür arqadaşı Meryem Kuku haber etti.
İyünniñ 21-nde onı Salavattaki cezahaneden büyreklerinde ağrı tutması ile hastahanege alıp ketkenler. Hastahanede bağırsaqnıñ müim funktsiyaları bozulğanı belli olğan. İyünniñ 23-nde qırımtatar uquq qoruyıcısı acele ameliyat etilgen.
"Ameliyattan soñ onı Salavattaki şeer hastahanesinden çıqardılar ve Ufadaki hastahanege avuştırdılar. Şimdi vaziyeti normaldir. Cumaertesi künü ekim tarafından baqılğan soñ hastahaneden çıqarılacaq ve cezahanege qaytarılacaq", - dep bildirdi apayı.
Emir-Usein Kuku – qırımtatar aq qorçalayıcısı ve faali. 2019 senesi noyabrniñ 12-nde Rusiyeniñ Cenübiy okrugınıñ arbiy mahkemesi onı «terror teşkilâtınıñ faaliyetini teşkil etkeninde» qabaatlap, 12 yılğa üküm etti. Amnesty International Kukunı vicdan mabüsi dep saya.
«Memorial» aq qorçalayıcı merkezi Emir-Usein Kukunı siyasiy mabüs dep tanıdı. 2020 senesi dekabr ayında onı Levko Lukyanenko Ukraina devlet stipendiyasını alması içün namzet köstergenler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
