Rusiye Devlet dumasında internette akimiyet vekilleriniñ aqaretlevini küçük yaramazlıq olaraq tanığan qanun leyhası qayd etildi. Bu aqta Radio Svobodanıñ rus hızmeti bildire.
Rusiye Federatsiya Şurasınıñ anayasa qanunları komitetiniñ reisi Andrey Klişas, onıñ birinci muavini Lüdmila Bokova ve Devlet dumasınıñ vatandaş cemiyetiniñ inkişafı komitetiniñ reis muavini Dmitriy Vâtkin «Küçük yaramazlıq» memuriy maddesine internette «cemiyet, devlet, resmiy devlet timsalleri, Anayasa ve devlet akimiyeti organlarına sayğısızlıq köstergen» malümatlarnıñ tarqatılmasınen bağlı mesuliyetni ilâve etmege teklif eteler.
Rusiyeniñ memuriy cinayetler kodeksine köre, küçük yaramazlıq içün ceza 1 biñden 5 biñ rublege para cezası ya da 15 kün apis cezası olaraq belgilenmekte.
Bunıñnen beraber «Malümat, informatsion tehnologiyalar ve malümat qoruvı» qanunına tüzemetler kirsetildi, baş prokuror ve onıñ muavinlerine Roskomnadzorğa muracaat etip, akimiyetni aqaretlegen malümatnıñ mahkemeden tış blok etilmesini talap etmek aqqı bar.
Daa evel haber etilgeni kibi, Rusiye Devlet duması cemiyet içün müim olğan yañlış malümatnıñ kütleviy haber vastalarında ve internette derc etilmesini yasaqlağan qanun leyhalarını baqacaq.
