Maarif nazirligi pek telükeli yuqunçlı hastalıq aşısı olmağan ve bu hastalıqları teşkerilmegen balalarğa tasil müessiselerine barmaqnı yasaqlamağa teklif etti, dep bildire Azatlıq Radiosınıñ rus bürosı.
«Vesti» Rusiye devlet telekanalınıñ «İnterfaks» neşiriniñ malümatına esaslanıp bildirgenine köre, böyle mektüp Devlet Dumasınıñ sağlıq komitetine yollandı.
Memlekette umumiy tasilni (9-ıncı sınıfqa qadar) Rusiye Anayasası kefil ete. Amma nazirlikte tasil aqqı bozulmaycaq, dep tüşüne, çünki talebeler uzaqtan ya da evden oquy bile.
Aprelniñ başında Rusiye sağlıq nazirligi aşılardan vazgeçüv çağıruvları ve böyle muracaatlarnıñ derc etilmesi içün ceza qanun leyhası üzerinde çalışqanını bildirdi.
Rospotrebnadzor malümatına köre, keçken sene Rusiyede qızamıq hastalarınıñ sayısı 13 qat arttı. «İzvestiya» nazirlikniñ malümatına esaslanıp, boğmaca hastalarınıñ sayısı eki qat artqanını bildirdi. 2019 senesi Dünya sağlıq teşkilâtı aşılardan vazgeçüvni sağlıq içün büyük telüke olaraq adlandırdı.
