Rusiyede keçken künü 6060 yañı koronavirus hastası qayd etildi. Bu operativ ştabnıñ soñki malümatıdır, dep haber ete Azatlıq Radiosınıñ rus hızmeti.
Bu yañı bir rekord. Hastalarnıñ sayısı pek tez arta. Bir kün evelsi 4765 yañı hasta qayd etildi. Rusiyeden çoq yañı hastalarnıñ sayısı artıq tek ABDde qayd etile.
Keçken künü Rusiyede 48 insan koronavirustan vefat etti – bu vaqıt devamında eñ yüksek raqam oldı. Rusiyede, resmiy malümatqa köre, COVID-19 hastalığından 361 insan vefat etti. Rusiyede hastalarnıñ sayısı 42 853-ke arttı. Dünyada 10-uncı yer ola. 3291 insan tüzelgen olaraq qayd etildi.
Operativ ştab malümatında qayd etilgenine köre, soñki künleri koronavirusı qayd etilgenlerniñ 40 fayızından çoqunıñ bir alâmeti yoq.
Moskvada 3570 yañı hasta bar. Bir afta içinde Rusiye paytahtında koronavirus hastalarınıñ sayısı 2,5 qat arttı. Moskva vilâyetinde 709 yañı hasta bar, diger regionlarda bu raqam bayağı azdır. Koronavirus Rusiyeniñ bütün regionlarında qayd etildi.
Rusiyeniñ bir çoq regionında karantin tedbirleri alına, Moskvada kirişlik rejimi ilân etildi. Amma fevqulâde vaziyet ilân etilmey. Moskva akimiyeti, şeerniñ tibbiy müessiseleri işini becerip olur, dep işandıra.
Rusiyede qırğınlıq Avropa memleketleriniñ çoqusından ve ABDden keç başladı. Eki afta evelsi hastalarnıñ sayısı tez artıp başladı. Akimiyet, qırğınlıq zirvesi daa olmadı, dep ayta.
