Rusiyede COVID-19 koronavirusınen hastalanğan insanlarnıñ sayısı 1836-ğa qadar arttı. Bu aqta operativ ştab bildire. Resmiy malümatqa köre, soñki kün devamında virus 35 regionda 302 insanda qayd etildi, eki hasta tüzeldi, bir kişi vefat etti, dep bildire Azatlıq Radiosı.
Daa evel belli olğanı kibi, Moskva ve Moskva vilâyetinde martnıñ 30-ndan itibaren sert karantin tedbirleri kirsetile. Evden tek acele tibbiy yardım almaq ya da ayat ve sağlıq içün telüke olğanda çıqmaq mümkün; insan işke barmağa mecbur olsa, çıqa bile; eñ yaqın tükân ya da aphanege bara bile; ev ayvanlarını 100 metrden çoq olmağan mesafege çıqarmaq mümkün; kerek olsa, çöplük atmağa çıqa bile.
Rusiye ükümeti karantin tedbirleriniñ bozuluvı içün mesüliyetni sertleştirmege razı oldı.
Umumen dünyada yañı koronavirus hastalarınıñ sayısı 720 biñ oldı. Aman-aman 34 biñ hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
