2023 senesi Rusiye Federatsiyasınıñ mahkemelerine "Rusiye ordusınıñ itibardan tüşürilmesi" aqqında 2870 memuriy protokol keldi (Rusiye Federatsiyasınıñ Memuriy cinayetler qanunnamesiniñ 20.3.3 maddesi). Rusiyeniñ Ukrayinağa istilâsı başlağanından berli aman-aman eki yıl içinde böyle davalarnıñ sayısı 8386 oldı, dep bildire Sibir.Aqiqat Rusiye umumiy yurisdiktsiya mahkemeleriniñ malümatını ögrenip.
2023 senesi mart ayında mahkemelerge eñ çoq - 335 "diskreditatsiya" davası keldi. Eñ az protokol keçken sene dekabr ayında yapılğan edi - 125.
"Diskreditatsiya" aqqında davalarnıñ sayısına köre Moskva (1019), ilhaq etilgen Qırım (562) ve Sankt-Peterburg (457) lider regionlar olaraq qala. Sibirde ve Uzaq Şarqta - Saha (141), Baykal bölgesi (130) ve Hantı-Mansiy muhtar okrugı (127) liderlerdir.
Sibir.Aqiqatnıñ qayd etkenine köre, ordunıñ "diskreditatsiya"sı aqqında protokollar Çeçenistan cumhuriyetiniñ mahkemelerine alâ daa berilmegen. Qazahistannıñ Baykonur kosmodromına ait olğan 26-ncı garnizon arbiy mahkemesinde eñ az beş dava baqıldı.
Rusiye sakinleri arasında alınğan protokollarnıñ sayısına köre lider Volğograd faali, etnik ukrayin Vitaliy Gotra - 2022 senesi 23 iş boyunca aman-aman 700 biñ ruble miqdarında para cezasını aldı. Ekinci yerde Sankt-Peterburgdan sabıq arbiy hızmetçi İlya Hrapko buluna, oña qarşı 2023 senesi içtimaiy ağlarda yazıları içün 15 protokol tizildi, amma soñra olarnı bir davağa birleştirdiler.
Umumen Rusiyede, Sibir.Aqiqat saytınıñ esaplarına köre, 5800-den ziyade insan "diskreditatsiya" maddesi boyunca para cezasını aldı.
Rusiyeniñ Ukrayinağa büyük cenki başlağanından soñ, Rusiye akimiyeti "Rusiye Silâlı quvetleri aqqında sahte ve itibardan tüşürüv" içün memuriy ve cinaiy mesüliyetni tayin etti. "Yalanlar" maddesine köre, Rusiye ordusınıñ arbiy cinayetleri aqqında yazğan vatandaşlar taqip etile, ''itibardan tüşürüv'' maddesine köre ise, ukrayina zıddiyeti boyunca Rusiye akimiyetiniñ mevamınen razı olmağanlar taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
