Rusiyede 17 yılğa mahküm etilgen aqyarlı qırımtatarı Enver Seytosmanovnıñ advokatı Emil Kurbedinov ükümge istinaf şikâyetini bermege niyetlene, dep bildirdi.
Bu aqta o, Qırım.Aqiqat mühbirine bildirdi.
«17 yıl – qorquzuv areketidir, elbet. Bu yıl büyük apis cezaları ceetinden «bereketli» oldı», – dedi Kurbedinov.
Onıñ qayd etkenine köre, Seytosmanovnı başta «yasaqlanğan teşkilâtta iştirak etkeninde», amma tahqiqatnıñ soñki basamağında «terror teşkilâtınıñ faaliyetini teşkil etkeninde» qabaatladılar.
«Tahqiqat yekünlengende tasnif ğayrıdan yapıldı. Qabaatını aydınlatqanda tek bir ibare qoşuldı, sanki Zeytullayevnen (Ruslan, Aqyardaki «Hizb ut-Tahrir davasınıñ» mabüsi – QA) beraber teşkilâtçı ediler», – dep añlattı Kurbedinov.
«Eminim, Seytosmanov tutulğanda birden eki maqsadqa irişken ediler. Birincisi, 2015 senesi evi tintilgende Ruslan Zeytullayevge qarşı şaatlıq etmege razı olmağanı içün intiqam aldılar. O vaqıt ihtar etken ediler – bekle, seni de alacaqlar. Ve ekincisi – tahqiqatnen oğraşqan hadimlerniñ rutbesini aqlav», – dep tüşüne advokat.
Rostov-na-Donu Cenübiy okrugınıñ arbiy mahkemesiniñ qadıları dekabrniñ 5-nde aqyarlı qırımtatarı Enver Seytosmanovnıñ ükmüni çıqardı. Onı bir yıl azatlıq sıñırlanmasınen 17 yıl sert rejimli koloniyada qalmasına mahküm ettiler.
Rusiye quvetçileri ağa-qardaş Ernes ve Enver Seytosmanovlarnı 2018 senesi mayısnıñ 10-nda Aqyarnıñ Balıqlava rayonınıñ Hayto (Tılovoye) köyünde tintüvlerden soñ tutıp alğan edi.
Ernesni daa soñra yiberdiler, Enverge ise cinaiy dava açılğanı aqqında haber etildi. Onı Rusiye Ceza Kodeksiniñ 205.5 maddesine (terror teşkilâtınıñ faaliyetini teşkil etüv ya da iştirak etüv) istinaden qabaatlaylar.
«Memorial» aq qorçalayıcı merkezi Seytosmanovnı siyasiy mabüs olaraq tanıdı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
