2025 senesiniñ ilk eki ayı içinde uçucısızlar Rusiyede eñ az 16 cermay sanayı obyektine ücüm etti – bunı region sakinleriniñ malümatına ve menbalarına esaslanıp, ücümler aqqında bildirgen Astra neşiri esapladı.
Astra cedvelge 17-nci obyektni qoştı – Engels şeerindeki «Kristall» cermay bazası, Rusiyeniñ Saratov vilâyeti. Bu federal müessisege «Engels-2» arbiy ava bazası içün yaqıt saqlav vazifeleri berilgen. Yanvarniñ başında ücümge oğrağan baza aman-aman bir afta yandı, yanğınnı söndürgen Rusiye Fevqulâde vaziyetler nazirliginiñ eki hadimi can berdi.
Eñ çoq adise Rusiyeniñ Krasnodar ülkesinde oldı. Anda Kaspiyskiy boru tel konsortsiumınıñ «Kropotkinskaya» cermay işlegen stantsiyası ücümge oğradı ve çalışmaycaq alğa ketirildi. Uçucısızlar İlskiy ve Afipskiy NPZ, OOO «Slavânsk-EKO» müessisesine de ücüm etti.
Rusiyeniñ Rostov vilâyetinde Kamenskiydeki cermay bazası ve AO «Transneft-Privolga» cermay stantsiyası ücümge oğrağan ediler.
Rusiyeniñ Belgorod vilâyetinde «Yuttek» cermay bazası fevralniñ 14-ne keçer gecesi ücümge oğradı, dep bildirdi salı künü Astra.
Uçucısızlar Volgograd, Saratov, Râzan, Tver, Nijniy Novgorod, Smolensk, Kaluga, Volgograd ve Orel vilâyetlerinde cermay zavodları, cermay bazaları ve stantsiyalarğa ücüm etti.
Rusiye akimiyeti regionlarğa uçucısızlarnıñ ücümlerini tasdıqlay, Rusiye Mudafaa nazirligi ise onlarnen ukrayin dronınıñ yoq etilgeni aqqında haber ete. Yerli sakinler dronlar cermay obyektlerini nişanğa alıp, olarğa urulğanını haber ete, yanğınlarnıñ foto ve videolarını derc eteler.
Ukrayina akimiyeti cermay anbarlarına yapılğan ücümler aqqında ara-sıra izaatlap, olar Rusiye ordusınıñ teminatında iştirak eteler, dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
