Rusiye naqliyat naziri Yevgeniy Ditrih, “Şeremetyevo” ava limanında 41 alad elâk olğanından soñ, Superjet-100 uçaqlarınıñ uçuşlarınıtoqtatmağa sebep yoq, dep tüşüne. Bu aqta Azatlıq Radiosı bildirmekte.
“Suhoy Superjet” - qısqa mesafeli Rusiye uçağı, o 2000-inci seneleri çetel şirketlerniñ iştiraginen işletilip çıqarılğan edi.
Mayısnıñ 5-nde aqşam «Suhoy Superjet-100» (SSJ-100) uçağı Moskvadan Murmanskqa yol aldı. İçinde 78 insan bar edi. Aman-aman birden qaza sebebinden qonmaq içün izin istedi, bundan soñ bağ üzüldi.
Sert qonğan uçaq uçuv-qonuv yolağına urulıp, şassisi zarar kördi ve yanmağa başladı. Neticede 41 insan elâk oldı.
Uçaq bozuqlığı - felâketniñ esas sebeplerinden biri sayıla. Bundan ğayrı tahqiqat başqa versiyalarnı da baqa: uçucılarnıñ, despetçerlerniñ ve tehnikiy baqımnı yapqan kişilerniñ yetersiz ihtisası; elverişsiz ava şaraiti.
Bu, Superjet-100-niñ yedinci adisesi. Amma bundan evel yekâne qaza İndoneziyada 2012 senesi olğan edi, anda 45 adam vefat etti.
Amma bu uçaqlar, köçüriciniñ bozuqlıqlarınen belli.
