Rusiye, Ukraina ombudsmeniniñ şahsiy mecburiyeti ile zapt etilgen ukrainalı deñizcilerniñ apisten azat etilmesine dair vesiqalarnı baqmağa devam ete, dep haber etti Ukraina Yuqarı Radasınıñ insan aqları vekâletlisi Lüdmila Denisova Azatlıq Radiosına.
«24 esir deñizcini şahsiy mecburiyetim esasında azat etsinler dep muracaat berdim. Şimdi bütün vesiqalar Rusiye Federatsiyasında FSB tahqiqat idaresiniñ reberi tarafından baqıla. Vesiqalar azırlanıla», – dedi Denisova.
Bundan evel o, «deñizcilerni qaytarmaq içün añlaşmalar bar», dep tarif etti.
«Deñiz uquqı halqara mahkemeniñ qararı bar. Soñki vesiqalar resmiyleştirile, tezden deñizcilerni Vatanda qarşılaycaqmız, dep tüşünem», – dep tarif etti o, Ğromadske neşirine.
İyülniñ 19-nda Rusiye Tış işler nazirligine Denisovanıñ şahsiy mecburiyeti ile 24 ukrainalı arbiy deñizciniñ apisten azat etilmesine dair muracaat berildi.
Şu künü Ukraina prezidenti Volodımır Zelenskıy Rusiye arbiy esir deñizcilerni qaytarmaq kerek, amma bunı deñişüv çerçivesinde yapmamalı, dep bildirdi.
Moskva mahkemesi iyülniñ 17-nde zapt etilgen 24 ukrainalı deñizciniñ apis müddetini uzattı. Andrey Artemenko, Andrey Eyder ve Vasiliy Soroka oktâbrniñ 26-na qadar, qalğanlarnı 24-ne qadar nezaret altında qalacaq.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
