Sentâbrniñ 3-ne keçer gecesi Rusiye Federatsiyasınıñ ordusı Zaporijjâdaki musafirhanege raketa darbesini endirdi. Eki yerli sakin can berdi – 38 yaşında qadın ve sekiz yaşında oğlançıq. Bu aqta Zaporijjâ vilâyetiniñ memuriyet yolbaşçısı İvan Fedorov bildirdi.
Daa eki insan yaralandı. 12 yaşında qızçıq reanimatsiyada buluna, dep bildirdi Fedorov. Elâk olğanlar ve yaralanğanlar bir qoranta azalarıdır.
Fedorovnıñ aytqanına köre, darbe neticesinde bina qısmen yıqıldı. «Patlav dalğası ve parçalar yanındaki çoq qatlı evge zarar ketirdi», – dep ayta o.
Soñki künde Rusiye arbiyleri Zaporijjâ vilâyetiniñ 11 mesken yerine 313 darbe endirdi, dep bildirdi Fedorov, mesken ev ve infrastruktura obyektlerine ketirilgen zarar aqqında 38 haber keldi.
Dnipropetrovsk vilâyetiniñ memuriyet yolbaşçısı Serğiy Lısak Dniproğa qarşı raketa darbesiniñ aqibetleri aqqında tarif etti, neticesinde bir insan elâk oldı, altı kişi yaralandı, biri daa hastahanede qala.
Dniproda üç maşina bütünley yandı, daa 12 maşina zarar kördi.
«Bala bağçası ve yedi mustaqil evniñ camları qırıldı. Müessise zarar kördi», – dep yazdı Lısak darbe aqibetleri aqqında. Angi müessise aqqında aytılğanı haber etilmey.
Atış yerinde olğan yanğın söndürildi, dep bildirdi Ukrayina fevqulâde vaziyetler devlet hızmeti.
Rusiye Mudafaa nazirligi Zaporijjâ ve Dniproğa qarşı raketa darbelerini izaatlamay.
Ukrayina Silâlı quvetleri Ava quvetleriniñ saba malümatında aytılğanına köre, salı kününe keçer gecesi Ukrayinağa 35 uçucısız ve üç «İskander» ballistik raketası ücüm etti. 27 dron urıp tüşürildi, daa altı danesi «coyuldı». Daa eki uçucısız Rusiyeniñ Belgorod vilâyeti ve işğal altındaki Donetsk vilâyetiye doğru uçtı, dep aytıla Ukrayina Silâlı quvetleriniñ malümatında.
Ava mudafaa vastaları bu gece Kyiv, Odesa, Harkiv, Mıkolayıv, Herson, Poltava, Çerniğiv ve Sumı vilâyetlerinde çalıştı, dep bildirdi Ukrayina arbiyleri.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
