Ukrayına akimiyeti Rusiye Zaporijjâdaki mesken evge ücüm etti, dep haber ete: bir qaç qat yıqıldı, elâk olğan ve yaralanğanlar bar.
Zaporijjâ şeer şurasınıñ kâtibi Anatoliy Kürtevniñ malümatına köre, Zaporijjâdaki beş qatlı mesken evge martnıñ 2-nde gece darbe endirildi, tahminlerge köre, S-300 raketalarınen.
Soñra Zaporijjâ vilâyetiniñ arbiy memuriyeti raketa ücümi neticesinde elâk olğan eki kişi aqqında bildirdi. Bu malümatnı fevqulâde hızmetler de tasdıqladı.
«Saat 06:30-da Zaporijjâ şeerinde raketa darbesiniñ yerinde Devlet fevqulâde vaziyetler hızmetiniñ bölükleri 11 insannı (bir qadın ağır ayaqlı) ve qomşu kirişten 20 sakinni qurtardı. Eki insannıñ cesedi çıqarıldı», – dep bildire Ukrayına Devlet fevqulâde vaziyetler hızmeti.
Qurtarıcılarnıñ malümatına köre, adise yerinde 90 insan çalışa, üç psiholog ve 24 dane tehnika bar. Yıqılğan bina yanında zarar körgenlerge yardım noqtaları açıldı, kommunal avtobuslar sağ qalğan insanlarnı tahliye ete.
Rusiye arbiyleri Zaporijjâğa raketa ve uçucısızlarnen darbe endire. Mesken evlerge açılğan ateş neticesinde vatandaşlar yaralana ve elâk ola.
Yanvarniñ ortasında S-300 raketası Zaporijjâ şeerinñ merkezinde bir meskenge tüşken soñ patlav dalğasından beş qatlı ev zarar kördi, Ukrayına akimiyeti balalar da olğan beş kişi yaralandı, dep bildirgen edi. Rusiye ordusı şeerge yılbaş bayramlarında da ateş açtı. Dekabrniñ 31-nde raketa ücümi neticesinde mesken evler zarar kördi, dört kişi yaralandı.
2022 senesi noyabrniñ 23-ne keçer gecesi Zaporijjâ vilâyetiniñ Volnânsk şeerinde yerli hastahaneniñ loqsa bölügi ateşke oğradı, endi doğğan bala elâk oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
