Oktâbrniñ 15-nde Zaporijjâ vilâyetiniñ arbiy memuriyetiniñ yolbaşçısı Oleksandr Staruh, rusiye ordusı gece Zaporijjâğa kamikadze pilotsız uçqan cihazlarnı atqanını ve saba raketa darbelerini endirgenini bildirdi.
"Duşman vilâyetimizni muntazam terrorğa oğratmağa devam ete. Shahed-136 pilotsız uçqan cihaznıñ ücümi neticesinde Zaporijjâda infraterkip obyektleri dağıldı. Yanğınlar çıqtı, amma yanğın söndüricilerimiz olarnı vaqtında söndürdi. Zarar körgenler yoq", - dep yazdı o.
Staruhnıñ sözlerine köre, saba rusiye ordusı şerge S-300 raketaları ile 10 kerek darbe endirgen, neticede bir sıra energetika ve sanayı obyektleri zarar körgen. Yaralanğanlar aqqında malümat alına.
"İşğalciniñ maqsadı bir - bizni yoq etmektir, yaşayışımıznı dayanılmaz yapmaqtır. Şimdi eñ esası telükesizlik qaidelerine riayet etmektir", - dep qoştı o.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
