Rusiye Yuqarı mahkemesi iyünniñ 13-nde istinaf şikâyetini baqıp, Qırım musulmanları davasınıñ mabüsi Vadim Bektemirovnıñ ükmü boyunca Rusiye Federatsiyası mahkemeleriniñ evelki instantsiyasınıñ qararını deñiştirmedi. Bu aqta "Qırım birdemligi" cemaat birleşmesine advokat Emil Kurbedinov bildirdi.
"Vadim, Rusiye Federatsiyası Ceza kodeksiniñ 205.5 maddesi ile terrorizmde qabaatlanıp mahküm etilgen siyasiy mabüs. Eski bir ikâye, amma tahmin etilgenine köre, Rusiye Federatsiyasınıñ Yuqarı mahkemesi de imayeniñ delillerini qabul etmedi ve ükümni ve Vlasihadaki İstinaf arbiy mahkemesiniñ istinaf qararını amelde qaldırdı, — dep bildirdi Kurbedinov.
Advokatnıñ aytqanına köre, FSB, Rusiye Yuqarı mahkemesiniñ 2003 senesi qabul etilgen "Hizb ut-Tahrir" diniy areketini terroristik teşkilât olaraq tanuv qararını" qullanıp, "terrorizm ile küreş adı altında siyasiy repressiyalarnı keçire, esasen, diniy erbaplarnı ve faallerni apiske alıp, uzun sıralarğa oturta".
2022 senesi fevralniñ 11-nde "Qırım musulmanları davasınıñ" mabüsi Vadim Bektemirovnı Rusiyeniñ Rostov-na-Donu Cenübiy okrugınıñ arbiy mahkemesi 11 yıl sert rejimli koloniyada qalmasına üküm etti.
2023 senesi aprel ayında Rusiyeniñ Vlasiha şeerindeki istinaf arbiy mahkemesi Bektemirovnıñ ükmüni deñiştirmedi. Advokat mahkeme oturışuvında cinaiy davanıñ deliller bazası aqsızlıqnen toplanğanını iddia etse de.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
