Rusiye Yuqarı mahkemesi Ukraina vatandaşı Yevgeniy Panovnıñ ükmüni deñiştirmedi. Panov, «Qırımda diversiyalarnı azırlağanında» qabaatlanıp sekiz yılğa üküm etilgen edi. Bu aqta Rusiye kütleviy haber vastaları bildire.
Bundan evel haber etilgeni kibi, Rusiye devlet qabaatlayıcısı mahkemeden Panovnıñ apis cezasını 10,5 yılğa arttırmasını rica ete.
Kreml nezaretindeki Qırım Yuqarı mahkemesi iyülniñ 13-nde «ukrain diversantları» davasınıñ iştirakçisi Yevgeniy Panovnı 8 yıl sert rejimli koloniyada qalmasına üküm etken edi. O, tahqiqat ile işbirliginden vazgeçti. Ukrainalınıñ imayesi ükümni şikâyet etti.
Oktâbrniñ 9-nda Panov Moskvağa avuştırıldı, onıñ davası Rusiye Yuqarı mahkemesine itiraz arizasınıñ baqılması içün berildi.
2016 senesi avgust ayında Rusiye Federal havfsızlıq hızmeti (FSB) ilhaq etilgen Qırımda «ukrain diversantları» yaqalanğanını ilân etken edi, olar yarımadada terakt kerçekleştirmege azırlanğan ekenler. Tutulğanlar belli bir müddet devamında Moskvanıñ Lefortovo SİZOsında olıp, Qırımğa ketirilgen edi.
Rusiye mahsus hızmetleri, tevqif etilgen Yevgeniy Panov ve Andrey Zahtey «diversantlar gruppasına» kirgen edi, dep bildirdiler, olar yarımadanıñ turistik ve içtimaiy infrastruktura yerlerinde terakt kerçekleştirmege planlaştırğan ekenler.
Ukraina akimiyeti rusiyelilerniñ ukrainlerge atqan qabaatlavlarını red ete ve bunı mahsus hızmetlerniñ provokatsiyası olaraq tanıy.
Zahtey tahqiqat ile mahkemeden evel añlaşma imzalağan edi. Fevral ayında o 6 yıl ve 6 ayğa sert rejimli cezahanede apis muddetine ve 220 biñ ruble (tahminen 105 biñ grivna) miqdarında para cezasına mahküm etilgen edi.
