Bu aqta "Qırım birdemliginiñ" advokatı Emil Kurbedinov bildirdi. Tofik Abdülgaziyev, Vladlen Abdülkadırov, İzet Abdullayev, Mecit Abdurrahmanov ve Bilâl Adilov Rusiye cezahanelerinde apis müddetlerini keçirmege devam etecekler.
Emil Kurbedinovnıñ aytqanına köre, RF Yuqarı mahkemesiniñ mahkemecisi şimdilik qarar qısmını oqudı, sebeplerni ise advokatlar soñra alacaq. Bunıñ içün mahkemeniñ bu qararı ne sebepten çıqarılğanı şimdilik belli degil.
"Mahkemede bizler, advokatlar, ve mabüslerimiz, çoq yıl devamında aytqan delillerimiz ile çıqışta bulundıq. Biz taqiplerniñ qanunsızlığı ve tınç toplaşuvlar, edebiyat ögrenilmesi ve ilâhre içün sert rejimli koloniyalarda böyle büyük müddetlerniñ berilüvi aqqında tam manada aytamız", — dep qayd etti Emil Kurbedinov.
Onıñ imayesi altında bulunğan Tofik Abdülgaziyev video konferentsiya vastasınen oturışuvda iştirak etti. Şimdi o, verem hastası ve Rusiye Cezalarnı yerine ketirüv federal hızmetiniñ Çelâbinsk vilâyeti boyunca idaresiniñ 3-nci hastahanesinde buluna. Onıñ aytqanına köre, ahlâq ceetinden yahşı, amma sağlığı "böyle şaraitlerde fenalaşa".
2019 senesi mart ayınıñ soñunda uquq qoruyıcılar Qırım musulmanları Tofik Abdülgaziyev, Mecit Abdurahmanov, Vladlen Abdülkadırov, İzet Abdullayev ve Bilâl Adilovnı yaqaladılar. Bu künü FSB hadimleri bir kereden Qırımnıñ 25-ten ziyade sakininiñ evinde tintüv keçirdi. Bu soñki on yıl içinde qırımtatarlarnıñ evlerinde keçirilgen eñ kütleviy tintüvler oldı.
2022 senesi mayıs ayında Rostov-na-Donunıñ Cenübiy okrugınıñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovnıñ qabaatlayıcı ükümlerini çıqardı. Müddetleri – 12 yıldan 14 yılğa qadar.
«Memorial» aq qorçalayıcı merkezi 2019 senesi martnıñ 27-nde Qırımda tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
