Cumaaqşamı künü, iyülniñ 11-nde, Rusiye Yuqarı mahkemesinde dört qırımtatarı, Ukraina vatandaşı – Zevri Abseitov, Remzi Memetov, Rustem Abiltarov ve Enver Mamutovnı – «terror faaliyetini kerçekleştirgende» qabaatlı tanığan Şimaliy-Kavkaz okrugınıñ arbiy mahkemesiniñ ükmüne qarşı temyiz arizası baqılacaq. Bu aqta advokat Edem Semedlâyev Qırım.Aqiqat mühbirine bildirdi.
Mahkeme oturışuvı saba saat 09:30-da başlanacaq: Moskva, Malıy Haritonvskiy aralığı, 12.
Advokatnıñ aytqanına köre, imaye, mahküm etilgenler Qırımğa mümkün olğanı qadar yaqın olğan koloniyalarda bulunmasını talap etecek.
Qırımtatar Milliy Meclisiniñ reisi Refat Çubarov Rusiye aq qorçalayıcıları, faal ve diplomatlarını iyülniñ 11-nde qırımtatar halqı ile birdemligini kösterip, Rusiye Yuqarı mahkemesi ögünde uzun müddetlerge üküm etilgen qırımtatarlarğa qoltutmalarına çağırdı.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
