Ukraina prezidentiniñ qırımtatar halqı işlerinden vekâletlisi, Ukraina halq deputatı Mustafa Cemilev Rusiyeniñ yarımadağa kiriş yasağı bitkenine baqmadan, işğal etilgen Qırımğa barıp olamay. Bu aqta Cemilev Qırım.Aqiqatqa aprelniñ 22-nde bildirdi.
Onıñ aytqanına köre, Qırımğa kiriş yasağı aprelniñ 19-nda yekünlendi. Faqat Rusiyede Cemilevniñ adı sanktsiyalar cedveline kirsetildi ve oña qarşı cinaiy işler açıldı.
«Üç kün evelsi Rusiyeniñ beş yıllıq (Qırımğa – QA) kiriş yasağı bitti. Amma keçken seneniñ soñunda olar yañı sanktsion cedvelni kirsetkenler, anda menim soyadım bar. Ve Rusiyege kiriş yasağım mevcbur. Qırımnı Rusiye toprağı dep sayalar, şu sebepten anda barıp olamayım. Bundan ğayrı, kiriş yasağından soñ olar maña qarşı bir qaç cinaiy iş açıp, meni qıdıruvğa ilân etkenler», – dedi Cemilev.
Qırımtatar halqınıñ lideri Rusiyeniñ yapqanlarından sebep şimdi işğal etilgen yarımadağa barmasınıñ «iç bir manası yoq», dep qoştı.
2014 senesi aprelniñ 22-nde Cemilev Qırım ve esas Ukrainanıñ memuriy sıñırından keçkende oña «Rusiyege kirişi yasaqlanğanına dair qarar» seslendirilgenini bildirgen edi. Vesiqada ne müür, ne imza bar edi, lâkin çetel vatandaşınıñ Rusiyege kirişi beş yılğa – 2019 senesi aprelniñ 19-na qadar – yasaqlana, dep aytıla edi. Rusiye Federal migratsion hızmeti buña iç bir alâqası olmağanını bildirgen edi, lâkin mayısnıñ başında Cemilevni işğal altındaki Qırımğa eki kere kirsetmediler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
