Rusiye ordusı Ukraina şarqında ücüm gruppalavnı şekillendirmek içün yañıdan gruppalav yapa, dep haber ete Ukraina Silâlı quvetleriniñ Baş ştabı.
«Esas ğayretini duşman Mariupol şeerini zapt etmek, İzüm rayonına ücüm etmek ve Donetsk yönelişinde mudafaanı keçmek içün toplay», – dep bildirdi Ukraina Silâlı quvetleriniñ Baş ştabı Facebookta.
Ukraina arbiyleriniñ malümatına köre, Yujnıy Bug yönelişinde Rusiye ordusı Ukraina silâlı quvetleriniñ ilerilemesine imkân bermemege ve bazı rayonlarda bölükleriniñ taktik vaziyetini eyiliştirmege tırışa.
Ukraina arbiyleri Volın yönelişinde arbiy ve yaşayış infrastruktura obyektlerine Rusiye raketa-bomba darbelerini endire bile, dep tenbiley.
Ukraina Silâlı quvetleriniñ Baş ştabı Donetsk ve Tavrika yönelişlerinde Rusiye Federatsiyasınıñ ordusı ateş tesirini ve ücüm areketlerini devam ettire, dep qayd etti – raketa-bomba darbeleri, meskün yerleriniñ yaşayış infrastrukturasına top ateşi kerçekleştirile, Berdânsk limanını ise Rusiye arbiyleri silâ, arbiy tehnika ve askerlerni taşımaq içün qullana.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
