Rusiyeniñ Saratov vilâyeti İvanteyevka köyünde dekabrniñ 23-ne keçer gecesi kimligi belli olmağan şahıslar arbiy komissarlıqnı yanğınğa berdi. Bu aqta Rusiye telegram kanalları, hususan «BAZA» bildire.
Berilgen malümatqa köre, yanğın nevbetçiniñ odasında çıqtı, oda ateşten büyük zarar kördi, lâkin binağa tarqalmadı. Yanğın çıqarğanlarnı qıdıralar.
Dekabrniñ 23-ne keçer gecesi Moskvadaki arbiy bölükte de yanğın oldı. Garaj boksları yandı. Rusiye Federatsiyasınıñ Fevqulâde vaziyetler nazirliginiñ malümatına köre, zarar körgenler yoq. Yanğın sebebi belli degil.
Cuma sabası TASS Rusiye devlet haber agentligi acele hızmetlerniñ malümatına esaslanıp, Moskvada Rusiye gvardiyasınıñ OMON binasında yanğın aqqında bildirdi. Haber etilgenine köre, yanğın zırhlı yelekler olğan odada çıqtı. Başqa tafsilâtlar yoq.
Ukrayınada büyük cenk başlağan soñ Rusiyeniñ farqlı regionlarında 20-den çoq arbiy komissarlıq ve diger arbiy obyektte yanğınlar qayd etildi. Bir qaç insan yanğın çıqarğanında qabaatlanıp mahküm etildi, digerleri tapılmadı.
