Rusiye arbiyleriniñ cenk areketleri vaqtında «Grad» parçaları Kyiv vilâyetiniñ Vorzelindeki bala evine tüşti. Bu aqta Ukraina Baş prokurorı İrina Venidiktova haber etti.
«Bu qanunsız areketler neticesinde yaralanğanlar yoq, çünki parçalar tüşkende balalar ve bala eviniñ hadimleri başqa binalarda ediler», – dep aytıla haberde.
Balalar bala evinden daa tahliye etilmedi, bala evinde bomba sığınağı ya da mağaz yoq, dep qoştı o.
«Prokuratura kirişkeninen olarnı tahliye etüv tedbirleri qabul etile», – dep qoştı Venediktova.
Kyiv vilâyetiniñ memuriyeti, Rusiye ordusı fevralniñ 25-nde Vorzelge yaqın Kyiv vilâyetiniñ Ğavrılivske köyüne ateş açtı.
Memuriyetniñ malümatına köre, ateş neticesinde barışıqsever eali arasında elâk olğanlar bar. Olarnıñ sayısı ögrenile.
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ücümge baqmadan, Kreml Ukrainanı işğal etmek niyetlerini red ete. Rusiye resmiy müessileri ücümnen bağlı vaziyetni pek az izaatlay, Ukraina tarafınıñ ölgen ve esir alınğan Rusiye arbiyleri aqqında malümatına cevap bermey.
Rusiye Mudafaa nazirligi snarâd ve raketalar mesken evlerge tüşkenini red ete, vatandaşlar arasında qurbanlar videosını nazirlik vekili «sahte» dep adlandırdı. Onıñ aytqanına köre, bunı «barışıqsever ealini qorquzmaq ve ğarbiy kanallarda köstermek» içün yapalar.
