Rusiye Federatsiyasınıñ Voronej vilâyetindeki Liskinskiy rayonında yerli cermay bazasında çarşenbe aqşamı keç vaqıtta büyük yanğın çıqtı.
Yanğın aqibetleriniñ videolarını içtimaiy ağlarda derc etken şaatlar cermay bazası dronlarnıñ büyük ücümine oğrağanını haber ete. Rusiye akimiyeti bu malümatnı resmiy şekilde daa tasdıqlamadı.
Cenkke qoltutqan bir sıra Telegram kanalı uçucısıznıñ ücümine Rostov, Orlov ve Belgorod vilâyetleri oğradı, dep bildire. Bir obyekt zarar kördimi şimdilik belli degil.
Rusiyeniñ Mudafaa nazirligi ava mudafaa sistemaları 27 dronnı urıp tüşürdi, dep iddia ete. Belgorod vilâyetinde 15, Voronej vilâyetinde yedi, Tambov vilâyetinde üç, Kursk vilâyetinde eki uçucısız yoq etildi, dep haber etile.
Ukrayina tarafı uçucısız ücümi aqqında malümatnı izaatlamadı.
Ukrayinağa qarşı büyük ücüm başlağanından berli Rusiye Ukrayinanıñ energetika ve gaz infrastrukturası obyektlerine ballistik raketalar ve dronlarnen toqtamayıp ücüm ete. Çarşenbe künü sabasında daa bir ücümden soñ, onıñ devamında Rusiye ordusı 40-tan ziyade raketa ve 70-ten ziyade dron atqan soñ, Ukrayina Harkiv, Sumı, Poltava, Zaporijjâ, Dnipropetrovsk, Kirovoğrad ve Lviv vilâyetlerinde elektrik energiyasınen teminlev sıñırlavlarını kirsetti. Soñki vaqıtları Ukrayina bu ücümlerge muntazam sürette cevap bere, aynı vaqıtta Rusiyedeki infrastruktura obyektlerine (esasen cermay ve gaz) raketalar ve dronlarnen ücüm ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
