Rusiyeniñ insan aqları vekâletlisi Tatyana Moskalkova Ukrayına ombudsmeni Dmıtro Lubinetsnen yaralanğanlarnı deñişüv meselesini muzakere etti. Online muzakerede Türkiye ombudsmeni Şeref Malkoç da iştirak etti.
Moskalkovanıñ aytqanına köre, taraflar «repatriatsiyağa uyğun ağır yaralanğanlarnıñ cedvelini deñişüvde yardım etüv» ve «sürgün etilecek vatandaşlarnıñ qaytarıluvına» kerekli organlarnıñ yardım etüvi aqqında añlaştı, dep yazdı Rusiye ombudsmeni Telegram kanalında.
Ukrayına tarafı Moskalkovanıñ Lubinets ile muzakerelerini daa izaatlamadı.
Cumaaqşamı künü Lubinets «Suspilne» Ukrayına cemaat telekanalına soñki vaqıtları Moskvanıñ Ukrayına cenk esirlerine munasebetinen bağlı «sıñırlı optimizmi» bar, amma Moskalkovanen muzakereler «zor keçe», dep ayttı.
Yanvarniñ 11-nde Ukrayına ve Rusiye ombudsmenleri Türkiyede körüşti. Neticesinde Moskalkova Twitterde 40 Rusiye cenk esirini deñiştirmege añlaştı, dep yazdı. Yanvarniñ 14-nde Reuters agentligi Ukrayına arbiyleriniñ malümatına esaslanıp, deñişüv Rusiye tarafınıñ teşebbüsinen lâğu etildi, lâkin Moskalkova olğan kibi yazdı, dep bildirdi.
Yanvarniñ 17-nde Türkiye ombudsmeni Şeref Malkoç Ankaranıñ yardımınen Ukrayına ve Rusiye arasında cenk esirlerini büyük deñişüvler azırlana, dep bildirdi. Onıñ aytqanına köre, Ukrayına tarafından 800 esir cedveli berildi, Rusiyeden – 200 kişilik. Moskalkova cenk esirlerini deñişüv añlaşmalarını red etti.
Türkiye İstanbuldan gumanitar koridor teşebbüsini köstere. Onı yaralanğan arbiy ve barışıqsever sakinler, birinciden bala, qadın ve esli-başlı insanlarnı çıqarmaq içün qullanmağa teklif eteler.
Ukrayına arbiylerniñ aqları vekâletlisi Olena Verbıtskanıñ malümatına köre, al-azırda Rusiye 3300 Ukrayına arbiyini esir tuta. 15 biñden çoq insan, şu cümleden vatandaşlar, ğayıp olğan sayıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
