Ankarada aprelniñ 15-16-nda Rusiye ve Ukrayina eyyetleri temsilcileriniñ Qara deñizde telükesizlik meseleleri boyunca körüşüvi ötkerilecek. Bu aqta CNN Turk Türkiye Mudafaa nazirliginiñ menbalarına esaslanıp haber ete.
Körüşüvde kimler iştirak etecek ve doğru olacaqmı aytılmay. Moskva ve Kyiv muzakereler aqqında bildirmediler. Yılnıñ başından olar aracılar vastasınen muzakerelerni keçirdi.
Türkiye Mudafaa nazirligi bildirgenine köre, aprelniñ 15-16-nda Ankarada çetel devletleriniñ arbiy vekillerinen Qara deñizde telükesizlik meseleleri boyunca körüşüv keçirecek. İştirakçilerniñ erkânı haberde aytılmay.
Cumaertesi künü Qara deñizde gemi areketi meseleleri Antalya diplomatik forumında Rusiye ve Türkiye Tış işler nazirleri Sergey Lavrov ve Hakan Fidan muzakere ettiler.
2022 senesi iyül ayında Rusiye ve Ukrayina BM ile boğday añlaşmasını ayrı-ayrı tizdiler. 2023 senesi iyül ayında Rusiye, ğarbiy memleketler añlaşmalarğa riayet etmegenini sebep kösterip, yıl devamında bir qaç kere uzatılğan aşlıq teşebbüsinden çıqtı.
Keçken aynıñ soñunda Rusiye Rosselhozbank, aşayt ve kübre istisalcılarına ve ihracatçılarına qarşı sanktsiyalar lâğu etilgen soñ Qara deñizde ateşni toqtatacağını bildirdi.
Ukrayina prezidenti Volodımır Zelenskıy Moskvanıñ beyanatını oyun dep adlandırdı. Washington Beyaz Saray Kreml qoyğan şartlarnı inceley, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
