Rusiye, Belarus ve "DNR" ve "LNR" qanunsız silâlı müfrezeler tarafından işğal etilgen Ukrayinanıñ topraqlarından programmacılarnı Google Summer of Code bütün dünya yarışında iştirak etüvden uzaqlaştırdılar.
"Mevcut vaziyetke köre, GSoC 2022 Rusiye, Belarus ve "DNR" ve "LNR"-den iştirakçilerni (iştirakçilerni, ustazlarnı, teşkilâtlarnıñ idarecilerini) qabul etmey", - dep yazıla yarışnıñ saytında.
Aynı zamanda teşkilâtçılar, boyevikler tarafından işğal etilgen "LDNR" topraqlarından ğayrı "Ukrayina topraqlarında bulunğan iştirakçiler içün sıñrlamalar olmağanını" qayd ettiler.
Google Summer of Code 2005 senesinden berli açıq çıqış kodu olğan leyhalarnı saylağan programmadır. Yarışta studentler iştirake etip ola, ğalipler grant ala.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net/. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
