«İşğalciler qırımtatar yazıcısı ve jurnalistini taqip eteler. Yanvarniñ 26-nda işğalciler «Nenkecan» mecmuasınıñ baş muarriri Zera Bekirovanıñ evinde qanunsız tintüv keçirdi», – dep aytıla haberde.
Qayd etilgenine köre, Rusiye uquq qoruyıcıları saba erte kelip, yarı gecege yaqın yibergenler. Bekirovadan ğayrı, qızı da sorğuğa çekildi.
Zera Bekirova – qırımtatar jurnalisti, Yañı Dünya gazetasınıñ sabıq baş muarriri, yazıcı, Ukrayına yazıcılar birliginiñ azası.
Qırımtatar Resurs Merkeziniñ malümatına köre, Qırım ilhaqınıñ başından berli 307 siyasiy mabüs ve cinaiy davalar boyunca taqip etilgen şahıs qayd etildi, olardan 206 - qırımtatar halqınıñ vekilleri.
Merkezniñ yolbaşçısı Eskender Bariyev bildirdi ki, 2023 senesi Qırımda uquq qoruyıcılar 173 yaqalanuv, 65 tintüv, 217 tevqif, 186 sorğu, em de adaletli mahkeme aqqınıñ ve 50-den ziyade sağlıq aqqınıñ bozuluvı ile bağlı aman-aman 300 adise qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
