Qırımnıñ Canköy rayonındaki Tarhanlar (Pobednoye) köyünde Rusiye uquq qoruyıcılarınıñ “terrorizm ile küreş talimi” keçirilgeninden areket qısmen qapatıldı. Bu aqta Rusiye kontrolindeki Canköy rayonınıñ memuriyet yolbaşçısı İnna Fedorenko haber etti.
“Oktâbrniñ 24-nde Tarhanlar köyünde gruppanıñ taktik-mahsus terror ile küreş talimi keçirildi. Bu soqaqlarda areket sıñırlanacaq: Kötvitskiy, Jitomirskaya, Lenin, Pobeda ve Pervomayskaya”, – dep aytıla haberde.
Talimler ne qadar devam etecek ve Rusiye akimiyetiniñ ne yapacağı aytılmay.
Qırımtatar resurs merkezi esaplağanına köre, 2025 senesiniñ ilk yarısında Rusiye Qırımda eñ az 45 arbiy talim keçirdi. 2024 senesi aynı müddet içinde 68 talim, 2023 senesi 10 talim, 2022 senesi 20 talim keçirilgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti "Ukrayina uçucısızlarına" qarşı atış, "ava mudafaasınıñ işi" ve Rusiye arbiyleriniñ "talimleri" dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
Qırımtatar resurs merkezi qayd etilgenine köre, 2025 senesi talimlerniñ umumiy sayısı keçken senege köre bir qaç qat eksildi, bu qadar büyük arbiy faallik yarımadanıñ askeriyleştirilüvi aqqında ayta.
