Rusiye ekstremizm ile küreş merkeziniñ hadimleri ve üyken prokuror Valentin Çuprina qırımlı advokat Emil Kürbedinovğa tenbi vesiqasını berdi. Bu aqta advokat Edem Semedlâyev Qırım.Aqiqatqa bildirdi.
«Bugün (noyabrniñ 6-nda – QA) olar Aqmescitteki ofisimizge sürip kirdi ve Emil Kürbedinovğa tenbi kâğıtını berdi. Oktâbrniñ 27-nde bunıñ kibi kâğıt «Qırım birdemliginiñ» toplaşuvında maña, Lilâ Gemecige (advokat – QA), Dilâver Memetovğa («Qırım birdemligi» cemaat birleşmesiniñ koordinatorı – QA) berilgen edi», – dedi Semedlâyev.
Oktâbrniñ 27-nde «Qırım birdemliginiñ» toplaşuvında Rusiye uquq qoruyıcıları advokat Edem Semedlâyev, uquqçı Lilâ Gemeci ve «Qırım birdemligi» cemaat birleşmesiniñ koordinatorı Dilâver Memetovnı ekstremizm ve terrorizm qanunlarınıñ bozulmaması aqqında tenbiyelegen edi.
Aqmescitte «Qırım birdemliginiñ» toplaşuvına oktâbrniñ 27-nde Rusiye prokuraturasınıñ hadimleri, maskalı insanlar ve politsiya hadimleri sürip kirdi.
Prokuratura hadimleri «Qırım birdemliginiñ» koordinatorlarından biri, Bağçasaraydaki «Hizb ut-Tahrir davası» mabüsiniñ oğlu Dilâver Memetov ve qırımlı uquqçı Lilâ Gemeci içün kelgen edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
