Qırımda Rusiye uquq qoruyıcıları tarafından tutulğan Ukraina Pravoslav kilsesi Qırım yeparhiyasınıñ arhiyepiskopı Kliment yiberildi. Bu aqta rusiyeli advokat Nikolay Polozov Qırım.Aqiqatqa bildirdi.
Advokatnıñ aytqanına köre, Rusiye uquq qoruyıcıları arhiyepiskop Klimentni protokol tizmeyip yiberdi.
Ukraina ombudsmeni Lüdmila Denisovanıñ martnıñ 3-nde aqşam bildirgenine köre, o, Rusiye insan aqları vekâletlisi Tatyana Moskalkova ile telefonda laf etti. Moskalkova «tutulğan arhiyepiskop Klimentniñ areketlerinde bir de bir bozuvlar tapılmadı, şu sebepten onı Kyiv saatına köre saat 20.00-de onı yibermek kerekler».
Arhiyepiskop Klimentniñ Qırım.Aqiqatqa bildirgenine köre, Rusiye uquq qoruyıcıları Ukraina Pravoslav kilsesi Qırım yeparhiyasınıñ arhiyepiskopı Klimentni Aqmescit bazarında olğanda «küfür sözler aytqanında» qabaatladılar.
Daa evel haber etilgeni kibi, Rusiye uquq qoruyıcılarınıñ aytqanına köre, arhiyepiskop Kliment Aqmescit avtovokzalında çantasında «kilseden hırsızlanğan eşyalar» bar olğanından şübhe olğanı içün tutuldı.
Ukraina Tış işler nazirligi Rusiye işğali altındaki Qırımda Rusiye uquq qoruyıcıları tarafından Ukraina Pravoslav kilsesi Qırım yeparhiyasınıñ arhiyepiskopı Klimentniñ tutulmasınen bağlı haberden qasevetlene. Ukraina nazirligi halqara meydançıqlarda, hususan BM, OSCE ve Avropa Şurasında buña diqqat celp etmek niyetinde.
Rusiye uquq qoruyıcıları martnıñ 3-nde Aqmescitniñ Merkeziy avtovokzalında Ukraina Pravoslav kilsesi Qırım yeparhiyasınıñ arhiyepiskopı Klimentni tuttı.
Ukraina Pravoslav kilsesiniñ matbuat hızmeti bildirgenine köre, İnsan aqları bozulğan ve azatlıqtan marum etilgen şahıslarğa yardım Pravoslav missiyasınıñ reisi arhiyepiskop Kliment Rusiyede apiske alınğan Ukraina vatandaşı Pavlo Grıbnıñ davası boyunca Rostov-na-Donu mahkemesine baracaq edi.
Rusiye uquq qoruyıcıları arhiyepiskop Klimentniñ tutulmasına dair malümatnı resmiy şekilde izaatlamay.
Daa evel belli olğanı kibi, Qırımdaki Rusiye akimiyeti Kyiv patriarhatınıñ Ukraina pravoslav kilsesiniñ ibadetleri keçirilgen Aqmescitteki aziz Vladimir ve Olga kafedral kilsesiniñ «binasını boşatmaq» kerekligi aqqında bildirdi.
Fevralniñ 13-nde Qırımnıñ Rusiye mal-mülk nazirligi Kyiv patriarhatı Ukraina pravoslav kilsesiniñ Qırım yeparhiyasına yollanğan talap yañı qurulğan Ukraina Pravoslav kilsesine keçken Kyiv patriarhatı Ukraina pravoslav kilsesiniñ yeparhiyası ile tizilgen añlaşmanıñ bitmesinen bağlı, dep bildirdi.
