Rusiye uquq qoruyıcıları Keriçniñ Rusiye memuriyeti yolbaşçısınınıñ muavini Yevgeniy Adamenkonıñ iş odasında «tahqiqat tedbirlerini» keçire. Bu aqta Keriç memuriyetiniñ yolbaşçısı Sergey Borozdin bildirdi.
«Kontrol-tevtiş idaremiz (KTİ) teşkerüv keçirgen edi, bunıñ neticeleri uquq qoruyıcı organlarına berildi ve olar teşkerüv yapa. Adamenko iş yerinde buluna», – dep tarif etti Borozdin «Krıminform» haber agentligine.
Borozdinniñ aytqanına köre, KTİ para hırsızlanğanından şübhe duyğun edi, amma memuriyet bunı itiraz etti.
«Hırsızlıq şübheleri bar edi. Bunı birden itiraz etkenler. (Teşkerüv malümatında) 2016-2017 seneleri maliye bozuvları bar edi, dep yazğanlar», – dep bildirdi Keriçniñ şeer yolbaşçısı.
Daa evel Qırımnıñ Rusiye yolbaşçısı Sergey Aksenov Keriç memuriyetiniñ yolbaşçı muavini Yevgeniy Adamenkonıñ memur karyerası parlaq, amma qısqa olacaq, dep vade etken edi. Şeer sakinleri Adamenkonıñ gizlemegen yüzsüzligini şikâyet ete.
Adamenko Keriçniñ mesken-kommunal hocalıq saasını idare ete.
Kütleviy haber vastalarında peyda olğan malümatqa köre, martnıñ 14-nde saba Keriç memuriyetiniñ yolbaşçı muavini Adamenko işke uquq qoruyıcı organlarınıñ hadimlerinen beraber keldi ve iş odasında Rusiye Tahqiqat komitetiniñ hadimleri çalışa.
