Link açıqlığı

Saatnıñ esas haberi

Rusiye uquq qoruyıcıları kütleviy tintüvler keçirilgen Aqmescit civarındaki qasabanı sarıp aldı


Qırımdaki tintüvler, 2019 senesi martnıñ 27-si
Qırımdaki tintüvler, 2019 senesi martnıñ 27-si

Qırımda Rusiye uquq qoruyıcıları sabadan tintüvler keçirilgen qırımtatarlar toplu yaşağan Mamaq (Stroganovka) köyüni sarıp aldı. Uquq qoruyıcıları çıqışlarda blokpostlarnı qoyıp, maşina ve bütün yolcularnıñ vesiqalarını teşkere. Bu aqta faal Lutfiye Zudiyeva Qırım.Aqiqat mühbirine bildirdi.

«Köy bütün çıqışlarda yol hızmetiniñ hadimlerinen sarıp alındı. Köyde FSB hadimleri tek qoltutmağa kelgenlerni degil, maşina nomeralarını da qayd etti. Remzi Bekirov ve Osman Arifmemetovnıñ evleri yanında avtozaklar tura. Köyde OMON, «Berkut» ve Rusiye gvardiyasınıñ çoq sayıda hadimi buluna», – dep tarif etti Zudiyeva.

Uquq qoruyıcılar Mamaqta tintüv keçirilgen dört qırımtatar faalini tutıp olamadı. Osman Arifmemetov, Remzi Bekirov, Vladlen Abdulkadırov ve Edem Yayaçikov evde degil edi, olarnıñ bulunğan yeri belli degil.

«FSB hadimleri olarnı tapmaq içün aman-aman er evge kirip çıqa edi. Soñki malümatqa köre, uquq qoruyıcılar Mamaq etrafından ketip başlay», – dedi Zudiyeva.

FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçire.

Umumen, «Qırım birdemliginiñ» malümatına köre, 20 insan tutuldı.

Bavurçıda keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Bunıñ sebebi Rusiye uquq qoruyıcıları ve Bavurçı qasabasınıñ sakinleri arasında çıqqan qavğa oldı.

«Qırım birdemligi» cemaat birleşmesiniñ haber etkenine köre, Aqmescitniñ Bavurçı qasabasındaki Memet Appazov soqağında semetdeşlerine qoltutmağa kelgen 5 kişi tutuldı. Olarnıñ soyadları qayd etilmey.

Rusiye FSBsi Qırımda tintüvler keçirilgenini tasdıqlap, şübhelilerniñ sayısını ve olarnıñ soyadlarını aydınlatmadı.

Haber etilgeni kibi, tintüvler Aqmescit rayonınıñ Mamaq (Strogonovka)köyü, Aqmescitniñ Bavurçı qasabası, Qarasuvbazar rayonınıñ Köneçi (Vladimirovka) köyünde keçirile.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG