Qırımda Rusiye uquq qoruyıcıları tarafından tutulğan Ukraina Pravoslav kilsesiniñ Qırım yeparhiyasınıñ arhiyepiskopı Kliment Qırımdaki Rusiye FSBsi İdaresiniñ Kiyev rayon bölüginde buluna.
Arhiyepiskop Klimentke qırımlı advokat Emil Kurbedinov ile beraber uquqiy yardım köstergen rusiyeli advokat Nikolay Polozovnıñ Qırım.Aqiqatqa bildirgenine köre, arhiyepiskopnıñ «tutulğanda küfür sözler qullanğanını» tasdıqlaycaq şaatnıñ kelmesi beklenile.
«Bir buçuq saattan berli politsiya bölüginde bulunamız. Arhiyepiskopnıñ politsiya tarafından tutulması vaqtında küfür sözler aytqanını tasdıqlaycaq şaatnıñ kelmesini bekleymiz», – dep ayttı Qırım.Aqiqatqa advokat.
Polozovnıñ tahmin etkenine köre, arhiyepiskop Klimentke qarşı memuriy protokol tizilecek, soñra ise mahkeme olacaq.
«Qaytmaycaq noqta keçti, dep tüşünem. Rusiye akimiyetini Klimentniñ ukrainalı siyasiy mabüslerni qorçalağanı, şu cümleden deñizcilerni ziyaret etkeni, olarğa qoltutqanı pek açuvlandıra. Memuriy protokol tizilecek ve mahkeme olacaqtır», – dep ayttı advokat.
Rusiye uquq qoruyıcıları arhiyepiskop Klimentni yerli saatqa köre 12.45-te (Kyiv saatına köre 13.45 – QA) Aqmescitte tuttı. Onı beş saattan berli yibermeyler.
Arhiyepiskop Klimentniñ daa evel bildirgenine köre, onı Qırımdaki Rusiye İç işler nazirliginiñ Kiyev rayon bölügine avuştıralar. Onıñ aytqanına köre, onı Aqmescit bazarında olğanda «küfür sözler aytqanında» qabaatladılar.
Daa evel haber etilgeni kibi, Rusiye uquq qoruyıcılarınıñ aytqanına köre, arhiyepiskop Kliment Aqmescit avtovokzalında çantasında «kilseden hırsızlanğan eşyalar» bar olğanından şübhe olğanı içün tutuldı.
Ukraina Tış işler nazirligi Rusiye işğali altındaki Qırımda Rusiye uquq qoruyıcıları tarafından Ukraina Pravoslav kilsesi Qırım yeparhiyasınıñ arhiyepiskopı Klimentniñ tutulmasınen bağlı haberden qasevetlene. Ukraina nazirligi halqara meydançıqlarda, hususan BM, OSCE ve Avropa Şurasında buña diqqat celp etmek niyetinde.
Rusiye uquq qoruyıcıları martnıñ 3-nde Aqmescitniñ Merkeziy avtovokzalında Ukraina Pravoslav kilsesi Qırım yeparhiyasınıñ arhiyepiskopı Klimentni tuttı.
Ukraina Pravoslav kilsesiniñ matbuat hızmeti bildirgenine köre, İnsan aqları bozulğan ve azatlıqtan marum etilgen şahıslarğa yardım Pravoslav missiyasınıñ reisi arhiyepiskop Kliment Rusiyede apiske alınğan Ukraina vatandaşı Pavlo Grıbnıñ davası boyunca Rostov-na-Donu mahkemesine baracaq edi.
Rusiye uquq qoruyıcıları arhiyepiskop Klimentniñ tutulmasına dair malümatnı resmiy şekilde izaatlamay.
Daa evel belli olğanı kibi, Qırımdaki Rusiye akimiyeti Kyiv patriarhatınıñ Ukraina pravoslav kilsesiniñ ibadetleri keçirilgen Aqmescitteki aziz Vladimir ve Olga kafedral kilsesiniñ «binasını boşatmaq» kerekligi aqqında bildirdi.
Fevralniñ 13-nde Qırımnıñ Rusiye mal-mülk nazirligi Kyiv patriarhatı Ukraina pravoslav kilsesiniñ Qırım yeparhiyasına yollanğan talap yañı qurulğan Ukraina Pravoslav kilsesine keçken Kyiv patriarhatı Ukraina pravoslav kilsesiniñ yeparhiyası ile tizilgen añlaşmanıñ bitmesinen bağlı, dep bildirdi.
