Aqyardaki Rusiye taqiqat idaresiniñ hadimleri şeerniñ mekteplerinde ekstremizm ve terrorizmge qarşı küreş derslerini keçire.
Rusiye hızmetiniñ sentâbrniñ 27-nde bildirgenine köre, bunıñ kibi dersler Aqyarnıñ mekteplerinde yañı oquv yılında başladı. Anda «gençlerge ekstremizm ve ekstremist teşkilâtlarınıñ havflı olğanını aytıp, bu müitke celp etilmesine mania olmağa» tırışa ekenler.
№6 iç işler içtimaiy-gumanitar profiliniñ 10-uncı kadet sınıfı, №16 mektebiniñ 7-11 sınıfları ve Baydar (Orlinoye) köyüniñ №47 mektebiniñ talebeleri ile subetler keçirildi.
Rusiye uquq qoruyıcıları Aqyarnıñ oquv yurtlarında çalışqan ocalarnen de subetleşe.
«Mektep ocalarınıñ qayd etkenine köre, Aqyardaki Rusiye Federatsiyası Taqiqat komitetiniñ taqiqat idaresi vekillerinen ilk sefer laf etmeyler, ve gençlerniñ, hususan İnternet ağı vastasınen, böyle gruppalarğa celp etilmesine mania olmaq içün işbirligi yapmağa azırlar», – dep aytıla matbuat hızmetiniñ haberinde.
Aqyardaki Rusiye gvardiyasınıñ SOBR «Sokol» Rusiye mahsus bölüginiñ askerleri «Rubej-51» arbiy-vatanperver sport oyunı finalınıñ açılışında iştirak etti, ve mektep talebeleri içün yaqalav kösterip, silâ ve asker urbasınıñ sergisini keçirdi.
Rusiye mudafaa nazirligi, 2018 senesi mayısnıñ soñunda «Yunarmiya» Rusiye areketine 500-den ziyade Aqyar mektep talebesi qoşulğanını bildirgen edi. Ukraina aq qorçalayıcıları, işğal etilgen Qırımda balalar arbiy formatta terbiye etilgenini bir çoq kere qayd etken edi. Psihologlar zemaneviy Rusiye tasilinde balalarnıñ añına basqı yapılğanını bildire.
