Rusiye uquq qoruyıcıları Aqmescitniñ Borçoqraq-5 (Fontanı-5) qasabasında Ayder ve Arsen Bekirovlarnıñ evinde tintüv keçirdi. Bu aqta «Qırım birdemligi» birleşmesi haber ete.
Uquqçı Nazim Şeyhmambetovnıñ bildirgenine köre, Rusiye uquq qoruyıcıları ötkergen tintüvden soñ kimseni tutıp almadı. Uquqçınıñ aytqanına köre, tintüv keçirilgende oña Bekirovlarnı körmege imkân berilmedi. Rusiye iç işler nazirliginiñ vekilleri taqiqat tedbirleriniñ sebebini bildirmedi.
Şeyhmambetovnıñ qayd etkenine köre, evlerinde tintüv keçirilgen Bekirovlarnı qomşuları yahşı bir qoranta dep bile.
«Qomşularnıñ aytqanına köre, yahşı, çalışqır, örnek olacaq insanlar. İç bir vaqıt yañlış bir areket yapqanları, içki içkenleri körünmegen edi», – dep ayttı uquqçı.
Nazim Şeyhmambetovnıñ qayd etkenine köre, Rusiye uquq qoruyıcıları tintüv keçirgende Bekirovlarnıñ evleri yanında bir çoq yerli sakin toplaştı.
«Mında yaşağan vatandaşlar, esasen qırımtatarlar, kelgenler, birdemlik köstergenler. Kimseni belâda qaldırmaylar, aferin. Halqımız yaşağanınıñ bir alâmetidir. Bugünde-bugün halqımız dört yıldan berli muntazam sürette yapılğan repressiyalar ve basqıdan qorqmay. Demek ki, uquq qoruyıcılarnıñ siyaseti qırımtatarlarğa tesir etmedi», – dep qayd etti uquqçı.
Şeyhmambetov, Qırımda Rusiye uquq qoruyıcılarnıñ areketleri «sistematik olğanını» qoşıp, soñki künleri de qırımtatarlarnıñ evlerinde tintüvler ötkerilgenini qayd etti.
Sentâbrniñ 18-nde saba Rusiye uquq qoruyıcıları Aqmescitniñ Borçoqraq-5 (Fontanı-5) qasabasında yaşağan Ayder ve Arsen Bekirovlarnıñ evlerinde tintüv keçirdi.
Sentâbrniñ 13-nde saba Rusiye uquq qoruyıcıları «Qırım birdemliginiñ» faali Osman Belâlovnıñ evinde tintüv keçirgen edi. Tintüvden soñ Belâlovlarnıñ babası tutıp alındı, soñra ise çıqarılıp yiberildi.
Birleşken Milletler bu seneniñ ilk yarım yılında işğal etilgen Qırımnıñ ev ve toplaşuv yerlerinde yapılğan tintüvlerniñ sayısı keçken seneniñ yarım yılına baqqanda üç qat çoq olğanını qayd ete. Bu aqta işğal altındaki Qırımnıñ insan aqları vaziyetine dair maruzasında aytıla. Vesiqa sentâbrniñ 13-nde Kyivde Ukrainadaki BM insan aqları monitoring missiyasınıñ reisi Fiona Freyzer tarafından taqdim etildi.
Teşkilâtnıñ malümatına köre, qırımtatar faalleri tintüvlerden eñ büyük zarar kördi.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan «Hizb ut-Tahrir» teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
