Rusiye ordusı iyünniñ 20-ne keçer gecesi Ukrayınağa doquz ava ve yerustü raketanen ve 27 «Şahed» darbe uçucısızınen ücüm etti. Olardan beş raketa ve bütün dronlar urıp tüşürildi, dep haber ete Ukrayına Silâlı quvetleriniñ Ava küçleri.
Ava mudafaası Dnipropetrovsk, Zaporijjâ, Donetsk, Mıkolayıv, Herson, Harkiv, Kyiv, Çerkası, Poltava ve Vinnıtsâ vilâyetlerinde çalıştı. Esas yöneliş Dnipropetrovsk vilâyeti edi, kritik infrastruktura obyektleri ücümge oğradı, dep bildirdi Ukrayına arbiyleri.
«Ukrenergo» malümatına köre, Rusiye ordusı Vinnıtsâ, Dnipropetrovsk, Donetsk ve Kyiv vilâyetlerinde energetika obyektlerine ücüm etti. Başqa tafsilâtlar berilmedi.
DTEK malümatına köre, darbe issilik elektrostantsiyalarından birine endirildi, stantsiya donatmaları ciddiy seviyede zaraz kördi, üç insan yaralandı.
«Bu daqqaları energetikler ücüm aqibetlerini yoq etmek içün çalışa», – dep aytıla şirketniñ haberinde. Aynı vaqıtta issilik elektrostantsiyasınıñ bulunğan yeri aydınlatılmay.
Kyiv vilâyetinde mesken yerlerden birinde tüşken par alan sebebinden elektrik hatları ve müessiselerden biriniñ donatmaları zaraz kördi, dep bildirdi yerli akimiyet.
Rusiye arbiyleri Ukrayına regionlarına çeşit silâlardan muntazam surette ücüm ete. Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
