Fevralniñ 24-ne keçer gecesi Rusiye Ukrayinağa 185 Shahed darbe uçucısızını attı. Bu aqta Ukrayina Silâlı quvetleriniñ haberinde aytıla. Ücüm neticesinde Dnipropetrovsk, Odesa, Kyiv ve Hmelnıtsk vilâyetlerinde zararlar qayd etildi.
Odesa vilâyetiniñ arbiy memuriyeti bildirgenine köre, dron parçaları liman infrastrukturası, mustaqil evniñ cam ve damı, yengil maşinalarğa zarar ketirdi.
Kyiv vilâyetide kritik infrastrukturada zarar yoq, amma daa qurulğan çoq qatlı ev zarar kördi.
Dnipropetrovsk vilâyetinde keri qaytarılğan dron ücüminden ğayrı, regionğa bir top darbesi aqqında da haber etildi, yaralanğan ve can bergenler olmadı.
Hmelnıtsk vilâyetinde uçucısıznıñ ücüminden mesken evniñ tış tarafı, pencere, qapuları, damı ve yengil maşina zarar kördi. Patlav dalğası daa beş mesken evniñ pencerelerine zarar ketirdi, kimse yaralanmadı.
Ukrayina Silâlı quvetleri bildirgenine köre, 113 dron urıp tüşürildi, daa 71 uçucısız «yerde coyuldı». Radioelektron küreş vastaları qullanılğanda ya da başqa bir sebepten cihazlar közetüv sistemalarınıñ ekranlarından ğayıp olğanda böyle aytıla.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
