Rusiye ordusı Ukrayinağa qarşı Kursk vilâyetinden X-59 ava raketasını, Kursk, Orel ve Primorsk-Ahtarsktan 56 uçucısıznı uçurdı. Oktâbrniñ 16-sı aqşamından oktâbrniñ 17-si sabasına qadar devam etken ücüm malümatını Ukrayina Ava quvetleriniñ komandanlığı aydınlattı.
Berilgen malümatqa köre, Rusiye ordusı darbe dronlarını, çeşiti belli olmağan uçucısızlarnı qullandı. Ücümni Ukrayina Ava quvetleri ve Mudafaa quvetleriniñ aviatsiya, zenit raketa ordusı, radioelektron küreş bölükleri ve mobil ateş gruppaları keri qaytardı.
«Ava uruşı neticesinde Sumı, Kyiv, Poltava, Çerniğiv, Jıtomır, Mıkolayıv, Çerkası, Odesa ve Ternopil vilâyetlerinde 22 duşman uçucısızı urıp tüşürildi. Eki uçucısız Beyazrusiye tarafına ava boşluğından çıqtı, 27 darbe uçucısızı Mudafaa quvetleriniñ radioelektron küreş areketleri neticesinde coyuldı», – dep aytıla haberde.
Bundan ğayrı, Ukrayina arbiyleri cebege yaqın vilâyetlerde infrastruktura obyektlerine beş darbe uçucısızınıñ tüşkenini qayd etti.
Ukrayina Silâlı quvetleri «uçucısızlarğa oşağan şübheli şeylerni» körgende öz başına areket etmeiyp, polis, qurtarıcılar ya da yerli arbiy memuriyetke muracaat etmege çağıra.
Kyiv şeeriniñ arbiy memuriyeti paytahtta Rusiye ücümi neticesinde çoq qatlı ev zarar kördi, dep bildirdi. Yerli akimiyetniñ malümatına köre, kimse yaralanmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
