Rusiye ordusı martnıñ 2-nde gece Ukrayinağa 94 darbe dronını uçurdı, dep haber ete Ukrayina Silâlı quvetleri Ava küçleriniñ komandanlığı martnıñ 2-nde saba.
Ukrayina arbiyleriniñ malümatına köre, Shahed, Gerber, İtalmas ve diger uçucısızlar Orel, Millerovo, Şatalovo, Primorsko-Ahtarsk ve işğal etilgen Qırımnıñ Sarabuz qasabasından uçurıldı.
"İlk malümatqa köre, saat 08:00-ge qadar ava mudafaası memleketniñ şimali, cenübi ve şarqında Shahed, Gerbera, İtalmas ve diger dronlar olğan 84 duşman uçucısızını urdı/bastırdı", – dep aytıla haberde.
Ukrayina komandanlığı dört yerde 10 darbe dronınıñ ücümini ve eki yerde parçalarınıñ tüşkenini qayd etti.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.