Rusiye ordusı avgustnıñ 25-ne keçer gecesi Ukrayinağa 104 Shahed darbe uçucısızı ve çeşit taqlit uçucısızlarınen ücüm etti, dep bildirdi Ukrayina Silâlı quvetleriniñ Ava küçleri.
«İlk malümatqa köre, saat 08:00-ge qadar ava mudafaası memleketniñ şimali ve şarqında duşmannıñ 76 Shahed uçucısızını ve çeşit taqlit dronını urıp tüşürdi», – dep aytıla haberde.
Arbiylerniñ malümatına köre, 15 yerde 28 uçucısıznıñ darbesini qayd etti, dört yerde parçaları tüşti.
Rusiye arbiyleri çeşit silâlardan Ukrayina regionlarına muntazam sürette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturasına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.