Kıyivniñ Svâtoşın rayonında Rusiye raketa darbesiniñ neticesinde taşlanğan maşnalar yanıp başladı, dep bildirdi Ukrayina paytahtınıñ şeer arbiy memuriyetiniñ başı Sergiy Popko.
''Svâtoşın rayonında raketa darbesiniñ neticesinde taşlanğan avtomobillerniñ yanması qayd etildi. Tafsilâtlar aydınlatıla. Operativ hızmetler anda keteler", - dep yazdı o Telegram kanalında.
Solomenskiy rayonında çoq qatlı evniñ pencereleri patlav dalğası neticesinde yıqıldı. Bundan da ğayrı, mesken evniñ bir qaç dairesinde yanğın oldı. Şeer yolbaşçısı Vitaliy Kliçkonıñ malümatına köre, yedi zararlanğan kişi aqqında belli, episi hastahanege alındı. Bir ölü aqqında da belli.
Bundan ğayrı, Peçersk rayonında mesken olmağan binanıñ urulması qayd etildi.
Harkiv şeer yolbaşçısı İgor Terehov da şeerge yapılğan ücümler aqqında bildirdi. Onıñ aytqanına köre, mesken evniñ kirişi bozulğan, zarar körgenler aqqında malümat ögrenile. Şeerniñ bazı rayonlarında elektrik yoq olğan.
Rusiye arbiyleri muntazam sürette Ukrayina topraqlarını ateşke tutalar. Delillerge baqmadan, Moskva bu darbelerniñ maqsadı Ukrayinanıñ arbiy infraterkibi olğanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
