Dekabrniñ 31-nde saba Rusiye ordusı Ukrayinağa qarşı kütleviy ücüm başlattı.
Sumı vilâyetiniñ Şostka şeerinde 12 çoq qatlı mesken ev, eki tasil müessisesi zarar kördi, ayrı infrastruktura obyektleri yıqıldı, dep haber ete «İnsayder UA». Aynı malümatnı içtimaiy ağlarda şeer memuriyetiniñ reberi Mıkola Noga bildirdi. Vaqia yerinde qurtaruv bölükleri bar. Bunıñ neticeleri ögrenile.
Bundan evel Sumı vilâyetiniñ akimiyeti Rusiye küçleri Şostka cemiyetiniñ infrastrukturasına raketa darbesi endirilgenini tafsilâtsız haber etti, dep qayd ete Azatlıq Radiosı.
Kyivniñ arbiy memuriyeti bildirgenine köre, Rusiye raketa ücümi keri qaytarılğanda Darnıtskıy rayonındaki mustaqil evge raketa parçaları tüşti. Yanğın ve yıqıcılıq olmadı, yaralanğanlar aqqında malümat yoq, dep yazdı memuriyet başı Sergey Popko.
Ukrayina Silâlı Quvetleri Rusiye raketaları Harkiv vilâyetinde, Çerkası vilâyetiniñ şimalinde, Sumı ve Poltava vilâyetleriniñ sıñırında, em de Çerniğiv vilâyetiniñ cenübinde körüngenini bildirdiler.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
