Ukrayina istihbaratınıñ malümatına köre, Rusiye arbiyleri Ukrayinağa qarşı yañı darbeler azırlay, dep bildirdi Ukrayina prezidenti Volodımır Zelenskıy Quralaynıñ 29-nda Avstriya federal kantsleri Kristian Ştoker ile subetinde.
"Men Avstriyanıñ federal kantsleri Kristian Ştocker ile laf ettim. Rusiye ava ücümleri sebebinden taziyelerini bildirgenine teşekkürlerimni bildirem. Men kantslerge bizim istihbarat malümatımız aqqında haber ettim, olarğa köre ruslar Ukrayina şeer ve qasabalarına yañı kütleviy ücüm azırlaylar. Ortaqlarnıñ bu darbelerge beraber cevap bermeleri pek müim, ilk evelâ raketa mudafaasınıñ teminlevi ile", — dep yazdı o Telegramda.
Ukrayina devletiniñ yolbaşçısı planlaştırılğan ücüm aqqında tafsilâtlı malümat bermedi.
Quralaynıñ 25-nde Rusiye tış işler nazirligi Kıyivdeki "qarar qabul etüv merkezleri ve komandanlıq noqtalarına" ücüm etecegini ilân etti. Rusiye nazirligi beyanatında çetel vatandaşlarını, şu cümleden diplomatik missiyalar ve halqara teşkilâtlarnıñ temsilcilikleriniñ hadimlerini, Kıyivni tez vaqıtta terk etmek kerekligi aqqında tenbiledi.
Quralaynıñ 28-inde Birleşken Milletler Teşkilâtı Telükesizlik Şurasınıñ toplaşuvında Amerika Qoşma Ştatları Rusiyeni sert bir şekilde tenqit etti ve Kıyivge qarşı söz berilgen "sistemli darbelerden" vazgeçmege çağırdı.