Fevralniñ 18-nde saba Rusiye ordusı Ukrayınağa kene raketalarnen ücüm etti. Ukrayına Silâlı quvetleriniñ ava quvetleri eñ az dört «Kalibr» qanatlı raketası atıldı, dep bildirdi.
«Fevralniñ 18-nde Rusiye işğalci ordusı Ukrayınağa Qara deñizden dört dane «Kalibr» qanatlı raketasını attı. Eki raketa ava mudafaa quvetleri ve vastalarınen yoq etildi», – dep aytıla Ukrayına arbiyleriniñ haberinde. Berilgen malümatqa köre, Rusiye işğal etilgen topraqlarnıñ avasında taktik aviatsiyasını da qullandı.
Ukrayına akimiyeti ve kütleviy haber vastaları raketalar Ukrayına obyektlerine tüştimi bildirmey, lâkin Hmelnıtskıyde patlavlar ve Mıkolayıv vilâyetinde «ava mudafaasınıñ işi» aqqında haber etildi. Hmelnıtskıy vilâyetiniñ arbiy memuriyet yolbaşçısı Serğiy Ğamaliy fevralniñ 18-nde vilâyet merkezinde ava telükesi signalı vaqtında eñ az eki patlav oldı, dep bildirdi. Mıkolayıv vilâyetiniñ arbiy memuriyet yolbaçısı Vitaliy Kim Telegramda raketalardan biriniñ parça fotoresimini paylaşıp, bu Ukrayına ava mudafaasınıñ raketa parçalarıdır, dep bildirdi.
Saba Qara deñizde arbiy talilciler 12 «Kalibr» raketasını qayd etti. Ukrayına Silâlı quvetleriniñ vekili Natalâ Ğumenük olarnıñ vastasınen Rusiye er anda kütleviy darbe kerçekleştire bile, der tenbilegen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
