Rusiye ordusı martnıñ 1-ne keçken gecesi ukrayin toprağına ücüm uçaqları ile ücüm etti.
Odesa vilâyetinde uçucısız uçaqnıñ tüşmesi neticesinde şahsiy ev, müessise, yük ve yengil maşinalar yandı. Neticede bir insan elâk oldı, daa bir kişi yaralandı, dep yazdı vilâyet memuriyetiniñ yolbaşçısı Oleğ Kiper.
Harkivde pilotsız uçaqnıñ ücümi neticesinde yedi insan yaralandı, dep bildirdi vilâyet memuriyetiniñ yolbaşçısı Oleğ Sinegubov. Onıñ aytqanına köre, Rusiye uçucısız uçaqları şeerge doquz kere ücüm etti, eki memuriy bina, altı çoq qatlı ev, üç şahsiy ev, tükân, eki maşina, yaqıt stantsiyası, supermarket zarar kördi.
Pilotsız uçaqlardan biri hastahaneniñ üç qatlı binasına tüşti, damda yanğın çıqtı. Tibbiy müessiseden 64 adam tahliye etildi, olarnıñ arasında 56 hasta ve bir bala.
Ukrayina arbiy ava quvetleriniñ malümatına köre, Rusiye ordusı Ukrayinağa 154 dron uçurdı, olardan 103-ü urıp tüşürildi, daa 51 "lokatsiyası ğayıp oldı".
Rusiye arbiyleri çeşit silâlardan Ukrayina regionlarına muntazam sürette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
