Ukrayina arbiyleri Rusiye gece qullanğan 442 Rusiye uçucısızı, 34 X-101 qanatlı raketası ve “Kalibr” yedi qanatlı raketasını tesirsiz alğa ketirdi, dep bildire Ukrayina Silâlı quvetleriniñ Ava küçleri.
Ukrayina Silâlı quvetleriniñ malümatına köre, Rusiye darbesiniñ esas yönelişi – Lviv, Ternopil, Harkiv vilâyetleri.
Ukrayina arbiyleri 14 yerde 7 raketa ve 34 darbe uçucısızınıñ ücümini ve 6 yerde tüşürilgen parçalarnı qayd etti. Ücüm devam ete, çünki avada daa bir qaç Rusiye uçucısızı bar.
Ukrayina Silâlı quvetleriniñ Ava küçleri haber etkenine köre, noyabrniñ 19-na keçer gecesi duşman 476 darbe uçucısızı ve 48 ava ve yer astı raketasını qullanıp, Ukrayinanıñ kritik infrastruktura obyektlerine darbe endirdi:
- Şatalovo, Kursk, Orel, Millerovo, Primorsko-Ahtarsk – Rusiye, Sarabus – Qırım Muhtar Cumhuriyeti yönelişlerinden 476 Shahed, Gerber (diger uçucısızlar) (tahminen 300-ü – “Şahedler”);
- 40 dane X-101 qanatlı raketası (rayonlar: Rusiyeniñ Vologod, Astrahan vilâyetleri);
- 7 “Kalibr” qanatlı raketası (Qara deñizden”);
- “İskander-M” ballistik raketaları (rayon: Rusiyeniñ Rostov vilâyeti).
Ukrayina noyabrniñ 19-nda gece Rusiyeniñ kütleviy ücümine oğradı. Prezident Volodımır Zelenskıynıñ malümatına köre, Lviv, Ternopil, Prıkarpattâ, Kyiv, Mıkolayıv, Çerkası, Çerniğiv, Dnipropetrovsk vilâyetleri darbege oğradı. Zelenskıynıñ aytqanına köre, Rusiye ücümi neticesinde energetika, naqliyat, vatandaş infrastrukturası zarar kördi.
Yerli akimiyetniñ malümatına köre, Ternopilde mesken evlerge darbeler endirildi. Ukrayina İç işler naziri İğor Klımenkonıñ aytqanına köre, al-azırda 10 elâk olğan ve 37 yaralanğan aqqında belli. Qurtarıcılar yıqıntılarnı toplay, anda daa insanlar qala bile. Lviv vilâyetinde ve Prıkarpattâda energetik infrastruktura zarar kördi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.