Rusiye arbiyleri Çeçekniñ 29-na keçer gecesi Ukrayinağa 171 ücüm uçağı ile ücüm etti, olardan tahminen 120 uçaq "Şahediler" edi, dep bildirdi Ukrayina Silâlı quvetleriniñ Ava quvetleri. Olarnıñ malümatına köre, ücüm Rusiye Federatsiyasınıñ beş yönelişinden ve işğal etilgen Donetskten ve işğal etilgen Qırımnıñ Çauda burnu ve Sarabuz qasabasından yapılğan.
"Saba saat 8-de berilgen malümatqa köre, ava mudafaası tarafından memleketniñ şimalinde, cenübinde ve şarqında duşmannıñ "Şahed", "Gerber", "Italmas" ve diger tiplerinde 154 dronu urulğan", — denile beyanatta.
Ukrayina Silâlı quvetleriniñ Ava quvetleriniñ malümatına köre, 10 yerde 12 arbiy uçucısız uçaq uruldı, 12 yerde ise uçaq parçaları tüşti.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.